ಕೈ ಜಾರಿ ಜೆಡಿಎಸ್​ ಮುಡಿಗೇರಿದ ಮಂಡ್ಯ- ಇದು ರಮ್ಯ-ಅಂಬರೀಶ್​ ಮರೆತ ಸಕ್ಕರೆ ನಾಡಿನ ಕತೆ!

ರಾಜ್ಯ 2019 ರ ಲೋಕಸಭಾ ಚುನಾವಣೆಗೆ ರಾಜಕೀಯ ಲೆಕ್ಕಾಚಾರ ಆರಂಭಿಸಿದ್ದರೇ ಮಂಡ್ಯದಲ್ಲಿ ಮಾತ್ರ ಒಂದು ರೀತಿ ಅಸಮಧಾನ, ಆತಂಕ ಮನೆ ಮಾಡಿದಂತಿದೆ. ಅದ್ಯಾಕೋ ಗೊತ್ತಿಲ್ಲ ಮಂಡ್ಯ ಕಾಂಗ್ರೆಸ್​ ಕಾರ್ಯಕರ್ತರು ಕುಂತಲ್ಲಿ-ನಿಂತಲ್ಲಿ ಚರ್ಚೆ ಆರಂಭಿಸಿದ್ದು, ಸಕ್ಕರೆ ನಾಡು ಕೈ ಪಾಳಯದ ಕೈಜಾರಿ ತೆನೆಹೊತ್ತವರ ಪಾಲಾಗುತ್ತೆ ಅನ್ನೋ ಮಾತು ಕೇಳಿಬರತೊಡಗಿದೆ.

ಹೌದು ಶತಾಯ- ಗತಾಯ ದೇಶದಲ್ಲಿ ಎನ್​ಡಿಎ ಉರುಳಿಸಿ ಅಧಿಕಾರ ಹಿಡಿಯುವ ಕನಸಿನಲ್ಲಿರುವ ಕಾಂಗ್ರೆಸ್​ ಮುಕ್ತವಾಗಿ ಮೈತ್ರಿಯತ್ತ ಕೈಚಾಚಿದೆ. ಹೀಗಾಗಿ ರಾಜ್ಯದಲ್ಲಿ ಅತ್ಯಂತ ಹೆಚ್ಚು ಮತ ಪಡೆದರೂ ಬಿಜೆಪಿಯನ್ನು ವಿರೋಧ ಪಕ್ಷದ ಕುರ್ಚಿಗೆ ತಳ್ಳಿ ಕಾಂಗ್ರೆಸ್​​ ಜೆಡಿಎಸ್​ ಜೊತೆ ಕೈಜೋಡಿಸಿ ಅಧಿಕಾರ ಹಿಡಿದಿದೆ. ಅಷ್ಟೇ ಅಲ್ಲ ಲೋಕಸಭೆ ಚುನಾವಣೆಗೂ ರಾಜ್ಯದಲ್ಲಿ ಮೈತ್ರಿ ಮುಂದುವರೆಸುವ ಲೆಕ್ಕಾಚಾರಗಳು ಆರಂಭವಾಗಿದೆ.

ಹೀಗಿರುವಾಗಲೇ ಇದೀಗ ಕೈ ನಾಯಕರಿಲ್ಲದೇ ಅನಾಥವಾಗಿರುವ ಮಂಡ್ಯದ ಮೇಲೆ ಜೆಡಿಎಸ್​ ಕಣ್ಣು ಬಿದ್ದಿದೆ. ಇದು ಅಲ್ಲಿನ ನಿಷ್ಠಾವಂತ ಕಾಂಗ್ರೆಸ್​ ಕಾರ್ಯಕರ್ತರ ಅಸಮಧಾನಕ್ಕೆ ಕಾರಣವಾಗಿದೆ. ಮೈತ್ರಿ ಮುಂದುವರೆಸಲು ಕೆಲ ಲೋಕಸಭಾ ಕ್ಷೇತ್ರಗಳನ್ನು ತಮಗೆ ಬಿಟ್ಟುಕೊಡುವಂತೆ ಜೆಡಿಎಸ್​ ಕೇಳಿದೆ. ಆ ಲಿಸ್ಟ್​ನಲ್ಲಿ ಮಂಡ್ಯದ ಹೆಸರಿದೆ. ಇದಕ್ಕೆ ಕಾಂಗ್ರೆಸ್​ ಒಪ್ಪಿಗೆ ನೀಡಿದೆ ಎಂಬ ಮಾತು ಕೇಳಿಬಂದಿದೆ.

ಹೀಗಾಗಿ ಜೆಡಿಎಸ್​ನಿಂದ ಪ್ರಭಾವಿ ಅಭ್ಯರ್ಥಿ ನಿಲ್ಲಿಸಿ ಗೆಲ್ಲಿಸುವ ಮೂಲಕ ತಮ್ಮ ಎಂಪಿಗಳ ಸಂಖ್ಯೆ ಹೆಚ್ಚಿಸುವ ಕನಸು ಜೆಡಿಎಸ್​​ ಕಣ್ಣಲ್ಲಿದೆ. ಈ ಮಧ್ಯೆ ರಮ್ಯ ಚುನಾವಣೆ ಸೋತ ಬಳಿಕ ರಮ್ಯದತ್ತ ಮುಖ ಮಾಡೋದನ್ನೇ ಮರೆತು ಬಿಟ್ಟಿದ್ದಾರೆ. ಕಾರ್ಯಕರ್ತರ ಕಷ್ಟ ಕೇಳೋದಿರಲಿ ವಿಧಾನಸಭೆ ಚುನಾವಣೆಯಲ್ಲಿ ಮತ ಹಾಕೋಕೆ ಬಂದಿಲ್ಲ. ಹೀಗಾಗಿ ಊರಿಗೊಬ್ಬಳೇ ಪದ್ಮಾವತಿ ನಮ್ಮನ್ನು ಮರೆತೇ ಬಿಟ್ಟರು ಅಂತ ಜನ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇನ್ನೊಂದೆಡೆ ರೆಬೆಲ್​ ಸ್ಟಾರ್ ಅಂಬರೀಶ್​, ಬಹುತೇಕ ಸಕ್ರಿಯ ರಾಜಕಾರಣದಿಂದ ದೂರವೇ ಉಳಿದಿದ್ದು, ಮಂಡ್ಯವನ್ನೇ ಮರೆತು ಅವರದೇ ಲೋಕದಲ್ಲಿ ಮುಳುಗಿ ಹೋಗಿದ್ದಾರೆ. ಹೀಗಾಗಿ ಮಂಡ್ಯ ಕಾಂಗ್ರೆಸ್​ ಒಂದು ರೀತಿಯಲ್ಲಿ ಮಾಲೀಕನಿಲ್ಲದ ಮನೆಯಂತಾಗಿದ್ದು, ಇದೇ ಸೂಕ್ತ ಸಮಯವೆಂದು ಅರಿತ ಜೆಡಿಎಸ್​ ತಮ್ಮ ಬೇಳೆ ಬೇಯಿಸಿಕೊಳ್ಳಲು ಪೀಠಿಕೆ ಹಾಕಿದೆ.

ಇನ್ನು ಸ್ಥಳೀಯವಾಗಿ ಕಾಂಗ್ರೆಸ್​ನ ಬೆನ್ನೆಲುಬಾಗಿದ್ದ ನಾಯಕರು ಕೂಡ ಕಾಂಗ್ರೆಸ್ ತೊರೆದು ಜೆಡಿಎಸ್​ ಸೇರುತ್ತಿದ್ದಾರೆ. ಕಾಂಗ್ರೆಸ್​ನಲ್ಲೇ ಇದ್ದು ಬಹಿರಂಗವಾಗಿಯೇ ರಮ್ಯ ಸೋಲಿಗೆ ಮುನ್ನುಡಿ ಬರೆದಿದ್ದ ಶಿವರಾಮೇಗೌಡರು ಕೂಡ ಈಗ ಜೆಡಿಎಸ್​ ಸೇರ್ಪಡೆಯಾಗಿದ್ದಾರೆ. ಹೀಗಾಗಿ ಮುಖ್ಯಮಂತ್ರಿಗಳನ್ನ ಕೊಡುಗೆಯಾಗಿ ಕೊಟ್ಟ ಮಂಡ್ಯ ಕಾಂಗ್ರೆಸ್​​ ಈಗ ಅನಾಥವಾದಂತಾಗಿದೆ.

ಇನ್ನು ತಮ್ಮ ಅಗತ್ಯಕ್ಕೆ ತಕ್ಕಂತೆ ಮಂಡ್ಯವನ್ನು ಬಳಸಿಕೊಂಡು ಬಿಸಾಡಿದ ಮಾಜಿ ಸಂಸದೆ ರಮ್ಯ ಸೇರಿ ಕೈಪಾಳಯದ ನಾಯಕರ ಮೇಲೆ ಈಗ ಇಲ್ಲಿನ ಜನರಿಗೆ ಮೊದಲಿನಂತ ವಿಶ್ವಾಸ ಪ್ರೀತಿಯೂ ಉಳಿದಿಲ್ಲ ಅನ್ನೋದು ಈಗ ಎಲ್ಲರಿಗೂ ಗೊತ್ತಿರುವ ಸತ್ಯ. ಒಟ್ಟಿನಲ್ಲಿ ಮೈತ್ರಿ ಸಂಕಟಕ್ಕೆ ಕಾಂಗ್ರೆಸ್​​ ಮಂಡ್ಯವನ್ನು ಜೆಡಿಎಸ್​ಗೆ ತಾನೇ ಕೈಎತ್ತಿ ದಾನ ಮಾಡುವ ಸ್ಥಿತಿ ಎದುರಾಗಿದೆ.